Изненадувања или не, но екипата на Академија Пандев продолжува со одличните резултати на стартот од новата сезона на Првата македонска фудбалска лига. Синоќа, во последниот натпревар од четвртото коло од елитата, „пандевци“ по пресврт со 2-1 славеа над Ренова, а овој меч беше посебен за младиот фудбалер Мартин Ѓоргиевски.
Струмичкиот клуб кој го раководи македонската фудбалска легенда Горан Пандев важи за еден од најголемите расадници на млади таленти, а тренерот Александар Васоски вчера „лансираше“ нова голема надеж на тимот. Иако доста се заслија оваа сезона, одма почнаа фудбалските теми зошто постои АКАДЕМИЈА ПАНДЕВ, како на некој да му пречи да е прв, да се засилува па и да создава фудбалери, па еве на тие муабети пандевци лансираа ново име во кое гледаат иднина и секако дека нема да застанат тука.
„На вчерашниот натпревар против Ренова, свое деби во дресот на Академија Пандев имаше младиот Мартин Ѓоргиевски, кој на 16 години и 5 месеци ги одигра своите први минути во ПМФЛ. Мартин е капитен на селекцијата на Македонија до 17 години, а веќе почнува сериозно да се наметнува и во сениорскиот тим на Академија Пандев“, велат од редовите струмичкиот тим.
Академија Пандев е лидер на табелата со десет освоени бода, два повеќе од Струга Трум Љум и три од Ренова, Шкупи и Работнички.
ФОТО: АКАДЕМИЈА ПАНДЕВ
