По пауза од 29 години, повторно ќе се одигра дуелот на фудбалските шампионите на Европа и Јужна Америка. Вечерва на „Вембли“ во Лондон ќе се сретнат Италија и Аргентина.
Натпреварот насловен како „Финалисима“, беше договорен минатиот септември, набргу откако УЕФА и КОНМЕБОЛ силно се спротивставија на плановите на ФИФА, Светско првенство да се одржува на две години.
Актуелниот европски првак Италија, ќе го пропушти мундијалот, а причината е добро позната, поразот од Македонија во полуфиналниот бараж дуел. Манчини утеха ќе бара во вечерашниот дуел пеортив Аргентина, во кој за последен пат во синиот дрес на Аѕурите ќе настапи Џорџо Кјелини.
Аргентина предводена од Лионел Меси ќе се обиде да ја продолжи серијата од 31 натпревар без пораз. „Гаучосите“ се во трка да го достигнат актуелниот рекорд кој е во сопственост токму на нивниот вечерашен противник. Имено Италија, имаше низа од 37 натпревари без пораз, која заврши во октомври минатата година, со поразот од Шпанија во полуфиналето на Лигата на нации.
Воедно Аргентинците ќе атакуваат на вториот трофеј во ова натпреварување откако првиот го освоија 1993 година кога ја победија Данска.
Инаку ова е само трето издание на „Финалисима Купот“, во кое прв победник е селекцијата на Франција која во 1985-година во Париз беше подобра од Уругвај.
Вечерашниот дуел меѓу Аргентина и Италија ќе започне од 20:45 часот.
